উত্তৰ গুৱাহাটীৰ সোঁমাজত ব্ৰহ্মপুত্ৰৰ পাৰত অশ্বক্ৰান্তৰ মন্দিৰ আছে। অশ্বক্ৰান্ত আছিল শৰাইঘাট যুদ্ধৰ আহোম ৰজাসকলৰ প্ৰধান ঘাটি। এই ঠাইৰ পৰা আহোমসকলে শৰাইঘাট যুদ্ধৰ ৰণকৌশল প্ৰস্তুত কৰিছিল। আনহাতে এই ঠাইখন আছিল আহোম ডা-ডাঙৰীয়াসকলৰ কাৰণে পৱিত্ৰ ঠাই। দ্বাৰকাধিপতি শ্ৰীকৃষ্ণই ভাগৰত বিশ্ৰাম লোৱা বা ঘোঁৰাবোৰক এই ঠাইত জিৰণি ল'বলৈ দিয়া এই অশ্বক্ৰান্তৰ ঠাইখনৰ ইতিহাসৰ সাক্ষী দিবলৈ এই ঠাইত এতিয়া দুটা মন্দিৰ আছে, এটা কূৰ্মৰূপী ভগৱান জনাৰ্দন বিষ্ণুৰ আৰু আনটো অনন্তশায়ী বিষ্ণুৰ মন্দিৰ।

উত্তৰ গুৱাহাটীৰ শিলসাঁকোৰ পৰা এমাইলমান উত্তৰে ৰুদ্ৰেশ্বৰ নামৰ গাঁৱত ৰুদ্ৰেশ্বৰ দেৱালয় অৱস্থিত। এই দেৱালয়ৰ সৈতে আহোম ৰাজত্বৰ ইতিহাস জড়িত হৈ আছে। মহাৰাজ ৰুদ্ৰসিংহক আহোম ৰজাসকলৰ ভিতৰত সৰ্বশ্ৰেষ্ঠ আখ্যা দিয়া হয়। তেওঁ ১৬৯৬ খৃষ্টাব্দৰ পৰা ১৭১৪ খৃষ্টাব্দলৈ আহোম ৰাজপাটত আছিল। ৰুদ্ৰসিংহই আহোমৰ পশ্চিম সীমা কৰতোৱালৈ সম্প্ৰসাৰণৰ উদ্দেশ্যে উত্তৰ গুৱাহাটীৰ ৰজাদুৱাৰ আৰু ৰংমহলত এটা বিৰাট সৈন্য বাহিনীৰে বংগ জয়ৰ উদ্দেশ্যে উপস্থিত হয়।

আমিনগাঁও উত্তৰ গুৱাহাটী মান্দাকাটা পথেৰে গৈ নাজিৰাখাট এৰি কিছুদূৰ গৈ এখন ওখ পাহাৰৰ দাঁতিয়েদি এটা সৰু পথ পোৱা যায়। এই পথটো লেঙা হৈ কুৰুৱাত মিলি গৈছে। এই পাহাৰখনক কোৱা হয় সীতাপৰ্বত। এই পৰ্বতৰ ওপৰতেই বিৰাজমান দীৰ্ঘেশ্বৰী মন্দিৰ। যোগিনীতন্ত্ৰৰ মতে বৰবংশৰ মৌজাৰ দীৰ্ঘেশ্বৰী পৰ্বতক সীতাপৰ্বত বোলে।

ৰজাদুৱাৰত নিৰ্মিত আনন্দৰাম বৰুৱা স্মৃতিভৱনৰ গাতে লগাকৈ কানাই বৰশীবোৱা শিলালিপি আছে। প্ৰত্নতাত্ত্বিক বিভাগে এই শিলালিপিখন সংৰক্ষণ কৰি ৰাখিছে।